کے ایم سی انڈر ۔16 انٹر اکیڈمی کرکٹ ٹورنامنٹ کا انعقاد بھی اسی سلسلے کی کڑی ہے-
	01-Jan-2021
	بلدیہ عظمیٰ کراچی شہر میں صحت بخش سرگرمیوں کے فروغ کے لئے کوشاں ہے ، خاص طور پر کرکٹ جیسے مقبول کھیل کو بھرپور سرپرستی فراہم کی جا رہی ہے تاکہ ابھرتے ہوئے نوجوان کھلاڑیوں کی حوصلہ افزائی ہو اور وہ اپنی صلاحیتوں کے اظہار کے ذریعے ملک و قوم کا نام روشن کرسکیں، کے ایم سی انڈر ۔16 انٹر اکیڈمی کرکٹ ٹورنامنٹ کا انعقاد بھی اسی سلسلے کی کڑی ہے جس میں نوجوان کرکٹرز نے ثابت کیا کہ اگر انہیں مواقع فراہم کئے جائیں تو وہ نہ صرف علاقائی بلکہ ملکی اور عالمی سطح پر ناموری حاصل کرکے دکھا سکتے ہیں ، ان خیالات کا اظہار سینئر ڈائریکٹر ہیومن ریسورس مینجمنٹ جمیل فاروقی نے بلدیہ عظمیٰ کراچی کے محکمہ کلچر اینڈ اسپورٹس کے زیر اہتمام منعقدہ کے ایم سی انڈر ۔16 انٹر اکیڈمی کرکٹ ٹورنامنٹ کے سیمی فائنل میں پہنچنے والی ٹیموں کے کھلاڑیوں سے ملاقات کے موقع پر کیا، اس موقع پر محکمہ کلچر اینڈ اسپورٹس کے افسران اور ممتاز کرکٹرز بھی موجود تھے، سینئر ڈائریکٹر ایچ آر ایم جمیل فاروقی نے کہا کہ اس ٹورنامنٹ میں کراچی کی مختلف کرکٹ اکیڈمیز کی ٹیموں نے حصہ لیا اور تمام ہی مقابلے دلچسپ اور سنسنی خیز تھے، کراچی کرکٹ کا مرکز ہے اور یہ کھیل بچوں اور بڑوں سب ہی میں انتہائی مقبولیت رکھتا ہے، کراچی کے نوجوان انتہائی باصلاحیت اور محنتی ہیں، اس سطح پر انہوں نے جس کارکردگی کا مظاہرہ کیا ہے اسے ان کے بہتر مستقبل کی نوید کہا جاسکتا ہے، بلدیہ عظمیٰ کراچی مقامی سطح پر نئے اور نوجوان کرکٹ ٹیلنٹ کو متعارف کرانے کا کام جاری رکھے گی اور اس قسم کے معیاری اور اچھے کرکٹ ٹورنامنٹس کا انعقاد مستقبل میں بھی جاری رہے گا جس سے کرکٹ کی مقبولیت میں اضافہ ہوگا اور شہر میں صحت مند سرگرمیوں کو مزید وسعت اور فروغ ملے گا۔