ایڈمنسٹریٹر کراچی لئیق احمد نے کہا ہے کہ شہنشاہ غزل مہدی حسن کے مزار کو بہتر بنانے کے لئے بلدیہ عظمیٰ کراچی اپنی ذمہ داریوں کو پورا کرے گی-
	01-Feb-2021
	ایڈمنسٹریٹر کراچی لئیق احمد نے کہا ہے کہ شہنشاہ غزل مہدی حسن کے مزار کو بہتر بنانے کے لئے بلدیہ عظمیٰ کراچی اپنی ذمہ داریوں کو پورا کرے گی، مہدی حسن ایک عظیم گلوکار تھے جنہوں نے اپنی گائیکی کے ذریعے پوری دنیا میں اپنے وطن کا نام روشن کیا وہ کراچی کا قابل فخر اثاثہ تھے، محمد شاہ قبرستان نارتھ کراچی میں ان کی قبر ،کتبہ اور اطراف کے حصے کو ٹھیک کرکے رنگ و روغن اور پھولدار پودے لگائے جائیں گے، یہ بات انہوں نے نامور گلوکار مہدی حسن مرحوم کی قبر کی خستہ حالی کے حوالے سے شائع ہونے والی ایک خبر کا نوٹس لیتے ہوئے کہی، ایڈمنسٹریٹر کراچی نے ڈائریکٹر جنرل ٹیکنیکل سروسز ، ڈائریکٹر جنرل پارکس اینڈ ہارٹی کلچر اور سینئر ڈائریکٹر میونسپل سروسز کو ہدایت کی کہ فوری طور پر محمد شاہ قبرستان میں واقع مہدی حسن کے مزار اور ملحقہ حصے کا سروے کرائیں اور بلاتاخیر قبر اور اطراف کے حصے کی مرمت اور تزئین کی جائے، انہوں نے کہا کہ مہدی حسن کے پرستاروں اور ان کے اہل خانہ و عزیز و اقارب کو عظیم گلوکار کی قبر پر جانے میں کوئی مشکلات نہیں ہونی چاہئیں لہٰذا تمام کام اس بات کو ذہن نشیں رکھتے ہوئے کئے جائیں، ایڈمنسٹریٹر کراچی نے کہا کہ مہدی حسن کے مزار کو درست حالت میں رکھنے کے لئے انتظامات کئے جائیں تاکہ ان کی قبر اور اطراف کے حصے کو بارش کے پانی سے محفوظ رکھا جاسکے، بلدیہ عظمیٰ کراچی کے لئے یہ امر باعث فخر ہے کہ کے ایم سی کے زیر انتظام قبر ستان میں عالمی شہرت یافتہ گلوکار آرام فرما ہیںلہٰذا ان کی قبرکو بہتر بنایا جائے گا۔