میئر کراچی وسیم اختر نے کہا ہے کہ ملک کی تعمیر و ترقی میں اقلیتی برادریوں کا اتنا ہی کردار ہے جتنا دیگر لوگوں کا-
	26-Dec-2017
	میئر کراچی وسیم اختر نے کہا ہے کہ ملک کی تعمیر و ترقی میں اقلیتی برادریوں کا اتنا ہی کردار ہے جتنا دیگر لوگوں کا، پاکستان کو اس وقت ایک قوم بننے کی ضرورت ہے ، سیاسی و مذہبی اختلافات ختم کئے جائیں ، پاکستان میں تمام شہریوں کو یکساں حقوق حاصل ہیں اور ایک دوسرے کی خوشیوں میں شامل ہونے سے محبت ، اتحاد اور یکجہتی میں اضافہ ہوتا ہے، انہوں نے کہا کہ ہم سب آپ کی خوشیوں میں شریک ہیں،یہ بات انہوں نے کرسمس کے موقع پر سینٹ پیٹرکس چرچ کے دورے میں بشپ جوزف کوٹس (Bishop Joseph Coutts)سے ملاقات کے موقع پر کہی، اس موقع پر میئر کراچی کے ہمراہ پارلیمانی لیڈر اسلم آفریدی، خالد سلطان، قیصر امتیاز، ناصر تیموری ، سوزن تھامسن اور دیگر منتخب نمائندے بھی موجود تھے، میئر کراچی وسیم اختر کی سینٹ پیٹرکس چرچ میں آمد کے موقع پر بشپ جوزف کوٹس کے ساتھ فادر صالح ڈی گو(Saleh Diego)، پیرش فادر ماریو روڈ ریگز(Mario Rodriguez)نے میئر کراچی وسیم اختر کو خوش آمدید کہا۔میئر کراچی وسیم اختر نے بشپ جوزف کوٹس کو کرسمس کی مبارکباد پیش کرتے ہوئے کہا کہ سب کو ساتھ لے کر چلنا ہماری پارٹی پالیسی ہے اور میئر آفس بھی اس پر عمل پیرا ہے۔ اس موقع پر بشپ جوزف کوٹس نے مسیحی برادری کے لئے قبرستان کی جگہ فراہم کرنے پر میئر کراچی وسیم اختر کا شکریہ ادا کیا، انہوں نے کہا کہ میئر کراچی نے مسیحی برادری کے بڑے تہوار کرسمس کی خوشیوں میں شامل ہو کر مسیحی برادری کے لئے اچھا پیغام دیا ہے، واضح رہے کہ کراچی میں مسیحی برادری کے زیرانتظام 54 اسکولز ، متعدد اسپتال اور فلاحی ادارے بلاامتیاز و تفریق خدمات انجام دے رہے ہیں۔
	News Photo Gallery